有留意香港乐坛嘅朋友仔应该都知道，环球、华纳、sony呢三间唱片嘅歌手呢几年都冇乜点喺TVB蒲头。皆因喺版权风波之后，TVB就同三大唱片反咗面。再加上余咏珊、何哲图两公婆硬捧星梦旗下嘅歌手。搞到大台呢几年无论係音乐节目、慈善节目定剧集歌曲，基本都係畀星梦歌手霸晒。好似上个月咁，《陀枪师姐》同《燕云台》两部剧都係jw王灏儿唱主题曲，听嚟听去都係同一把声，你都咪话唔闷...旧时TVB啲剧集歌真係好多经典噶，《一生何求》《祝君好》《讲不出声》《义海豪情》等等等真係多到数唔晒啊!唔单止主题曲来来去去都係嗰几个人唱，就连作为四大颁奖礼之一嘅《劲歌金曲颁奖典礼》都走晒样。以前全盛时期嘅劲歌金曲，见证住谭张争霸，又造就咗四大天王嘅神话。“金曲金奖”“最受欢迎男女歌手”呢啲分量十足嘅压轴大奖，每年都战况激烈。再睇翻而家，所谓嘅劲歌金曲已经变成星梦剧集歌大杂烩，Maybe冇睇开大台剧集嘅朋友真係成头问号？到咗星梦年会，噢~讲错，应该喺劲歌金曲颁奖典礼先啱，就係星梦剧集歌分猪肉嘅时间。一个人攞几首金曲奖都唔出奇，真係人人有份永不落空！一场颁奖典礼落嚟，等于回顾咗一次成年嘅剧集歌?旧年嘅“最受欢迎男歌手”直情打孖嚟，真係睇到人头都痕...搞搞下，劲歌金曲嘅公信力都所剩无几。加上旧年开始《chillclub》都玩埋推介，上榜歌选择多，就连大台嘅剧集歌好似《呼吸有害》咁一样勇夺冠军歌。一对比，劲歌金曲真係超小圈子咯。见到个势色咁差，TVB梗喺唔会坐以待毙啦，喺上个月就即时急call奖门人曾志伟回巢。出名人脉广嘅奖门人，三两下手势就同三大唱片公司讲掂数。喺上个月嘅“音乐永续，乐坛同享”活动上面就正式宣布破冰。拖拉咗咁多年嘅版权问题终于都告一段落啦！真係听到都觉得兴奋啊！！喺奖门人接手音乐科之后，举办嘅第一个大show，就係琴晚出街嘅《博爱欢乐传万家》啦。唔知大家呢几年有冇留意TVB嘅慈善节目，好似《星光熠熠耀保良》咁，啲星光真喺越嚟越黯淡，基本上都喺星梦歌手轮番上阵，睇得多真係好冇瘾咯。难得同三大唱片公司搞好关系，今次嘅《博爱欢乐传万家》梗喺唔会再畀星梦歌手独大啦。喺大合照嘅时候，可乐君发现，就连星梦一姐菊梓乔都係企係一边咋。睇翻琴晚嘅正式表演，郑欣宜、郑融、JW王灏儿、泳儿互唱各自嘅首本名曲：《矛盾一生》《红绿灯》《花无雪》《女神》一唱一和，真係好正啊！！另外仲有AGA同Hana第一次同台合唱《狮子山下》。林奕匡陈柏宇林欣彤李幸倪都带咗新歌上嚟，真係好难得咁热闹，你哋琴晚有冇睇啊？呢个咁精彩嘅慈善show，只喺TVB音乐节目改革嘅头炮，后面精彩仲陆续有嚟~↓我哋前日都同大家分享过，播足四年嘅《流行经典50年》即将收官，让翻个黄金时段畀《劲歌金曲》。大台同ViuTV亦都表示双方歌手可以作客各自嘅音乐节目。歌手们可以自由咁去各个平台演出，对于广大乐迷嚟讲，呢个绝对係好事啦！不过，斋讲就冇用嘅，睇翻《劲歌金曲》今期嘅榜单，AGA、Eason嘅新歌即时上榜；而隔离《chillclub》嘅女歌手入围名单度，都见到王君馨个名。Wow~咁百花齐放嘅香港乐坛好耐冇见啦！迟下台庆，TVB仲宣布会再度举办《翡翠歌星贺台庆》，唔同公司嘅歌手都齐齐参与jam歌，真係好期待啊！睇得出TVB今次真心想搞翻起自家嘅音乐节目，可乐君都希望嚟紧嘅音乐节目会更加多元化。喺“劲歌金曲”上榜嘅广东歌丰富啲，年底嘅劲歌金曲颁奖典礼自然就更加有公信力同睇头！当然啦，作为观众都希望TVB嘅剧集主题曲可以搵多啲唔同嘅歌手或者创作班底合作，咁先有新鲜感噶嘛。Any肥，新版嘅《劲歌金曲》喺4月就会出嚟见大家，希望TVB今次唔好令大家失望啦~大家会有咩期待？可以喺评论区同可乐君分享一下你嘅睇法~
More·今日娱乐看点
《阿凡达》重夺全球票房冠军
虽然《阿凡达2》一拖再拖但《阿凡达》内地重映第二日票房就超过万，累计票房超过《复仇者联盟4》。
王子文承认已有儿子
王子文日前喺综艺节目
承认自己已经有小朋友，
之后仲喺微博发出
同仔仔嘅合照，
但就否认网上其他传闻。
我国婚姻登记人数下降
但广东省成为年
结婚登记人数最多嘅省份。
今日“”这串数字
谐音“爱你爱一生一世”
好多情侣为个好意头争登记
你有冇朋友结婚？
资料来源：微博、豆瓣
互联网综合整理
编辑：彭琳
*文中图片如涉及侵权请联系，立即删除
扫描下方
转载请注明：http://www.abachildren.com/hbyx/9.html
联系电话：